原來已經好耐冇update 過呢個blog，不過尋日見到居然有人comment，覺得都應該post 下野。

不過，先為咁耐唔update 搵下藉口先。

嗱，一來近來比較忙啦；咁二來，又冇乜野好寫喎。

你話：點會冇野好寫呀？就算你平日生活幾沉悶都好，呢排寫政論都大把野寫啦；先有財政預算案、又有特首辯論、又有兩會，點會冇野寫？

我又真係覺得冇乜喎。兩會我又唔識 (物權法問題好似幾重要，不過唔識)，財政預算案同特首辯論，其實冇乜新意者。財政預算案就大家都估到係咁架啦 (係估唔到有咁多盈餘啫)，佢減稅亦唔多關我事；特首辯論呢，我當日只係睇左頭半個鐘 (之後去左睇《英女皇》，真係充滿象徵意義)，兩者表現點，已有公論啦。至於梁家傑講嘅野有冇內容，我覺得其實而家香港有管治經驗嘅人得......well，兩個啫，其他人都係要邊做邊學架啦，問題係條learning curve 有幾steep 嘅啫。

話時話，同《英女皇》入面嘅貝理雅相比，香港嘅政治人物係演講嘅時候就係差左一份passion，一份真係相信自己講緊嘅野嘅信心。我相信呢個唔係寫手或者講者嘅問題，而係係香港，信念唔係政治中好重要嘅野，而除左個別時候嘅民主黨同公民黨以外，亦冇邊個政黨嘗試過推銷佢地嘅信念。

......

最近有一本新出嘅雜誌Monocle，我睇到經濟日報 (定唔知星島) 介紹之後買黎睇，又真係唔錯。本野有時事、商業、設計、消費，大大本，月刊90幾蚊一本，都抵睇。主事者話想做到好似《明鏡》咁，德文嘅《明鏡》我唔識睇，英文個網就成日睇，同Monocle 比，選材方面都幾似，Monocle 會多D 《Wallpaper*》嘅感覺，話哂都係同一個人攪。睇美國雜誌睇到悶嘅，可以考慮下。唔知幾時先會有本中文雜誌可以做到呢個水平呢？