幾點。

1. 為免「內容偏頗」，之前講過曾生，今次要提下梁大狀。其實都係幾日前嘅事，大狀出席醫學會嘅論壇，被問及佢唔夠行政經驗。能言善辯嘅大狀就話嘞：而家又唔係選AO (大意)......佢(曾)嘅專長係做AO，咁咪繼續做囉！

其實自從上次特首係答問大會上寸過大狀冇行政經驗之後，佢嘅競選班底應該都諗過萬幾次點答呢條問題啦掛？居然答成咁？

嗱，我唔係單純咁「唔鐘意」佢嘅回應。一個好嘅回應，以我嘅理解，至少應該做到吹噓自己同打低對手，而梁大狀呢個回答就一樣都做唔到。可能我唔係公關專家所以唔明背後嘅道理，但係一個比較正路嘅答案應該係大致上有：「係囉，曾特首不知幾有經驗，首先佢回歸之後大洗，結果政府係咁擴張，金融風暴一黎財赤就問市民要錢；做左特首之後就乜都做唔到，銷售稅收回，西九推倒，食安嚴重......唯一做得成嘅只有幫自己起新總部。」先總結曾生嘅「施政」黎說明佢自己所謂嘅行政經驗根本不值一哂，然後再解釋：「點解做唔成呢？因為曾特首冇民意認受，唔係普選產生，又冇自己願景，根本唔知應該要做乜，所以只要有爭議就唔敢執行。」咁咪可以再sell 下自己囉。

係咪聰明過人嘅競選班底諗到D我地諗唔到嘅野呢？可能係嘅。不過，選民係想聽到佢地心裡面過句喎。

2. 據報道，曾特首想香港形成一個大都會經濟，不過暫時仲差一D「文化基建」。我估係具豐富行政經驗嘅特首心目中，文化基建就會係幾個博物館、幾個音樂廳、同一個新藝術基金咁。或者佢應該睇下上年NY Times 呢篇同Observer呢篇。

NY Times 果篇提到，現時城市最重要就係吸引25-34歲，受過高等教育嘅所謂「Creative Class」。由於佢地係35歲之後會relocate嘅機會越來越低，吸引到佢地嘅城市唔單只係當下，而係係未來十幾年都會領先於其他地方。點吸引佢地？篇文話，官方宣傳未必有用 (Too bad, Donald) ，因為一來，唔同嘅城市吸引唔同嘅人，所以冇話可以照搬其他地方嘅成功方法，而二來，呢班人比較相信口耳相傳嘅資訊。篇文總結嘅quote 講得好：

"The real issue was, is your city open to a set of ideas from young people, and their wish to realize their dream or objective in your city," he said. "You could go out and build bike paths, but if that's not what your young people want, it's not going to work."

香港有冇用心聽過年青人嘅聲音？

至於衛報果篇，其實主要係講旅遊嘅。不過亦有一點值得一提。入面話，大學生同同性戀者係旅遊嘅先驅者：佢地去嘅地方係幾年後往往會成為至熱門嘅旅遊點。香港對佢地吸唔吸引？你話嘞。

再講非洲

上午講開關於非洲嘅野，有幾方面想補充下。雖然我都唔係專家，但係Blog 本來就係比唔係專家嘅人發表議論，係咪？

首先係關於僱傭兵嘅野。係血鑽入面活動嘅僱傭兵，現實中應該係來自南非嘅Executive Outcomes 或者 Sandline 。EO係一個係南非白人政府倒台前成立嘅公司，成員主要來者當時解散嘅幾個前白人政府軍隊同機構，包括Battalion 32，Civil Cooperation Bureau 等等。Battalion 32 嘅來源比較「正路」，係由係1975 年安哥拉內戰部分打輸嘅軍人組成，之後再參予安哥拉內戰；但係其他CCB、Koevoet、以及Vlakplaas就係南非白人政府之下嘅特別警察，專做間碟、暗殺之類嘅野，講得唔好聽真係同SS相去不遠。

咁種族分離政府倒台之後，呢D組織亦一一解散，為求生計，部份人運用佢地唯一嘅技能 - 打仗 - 跟隨佢地嘅上司加入EO。EO 首個重要任務，諷刺地，就係返安哥拉對付南非政府曾經支持過嘅UNITA。EO 除左直接收取報酬之外，亦會要求佢地幫助嘅政府將某D天然資源嘅開發權交比同EO有關嘅公司。EO 受聘於塞拉里昂政府去對付RUF之後不久，同EO有關嘅兩間公司就獲得估計價值超過十億美金嘅鑽石開採權。

國際上當然唔只得南非會提供僱傭兵。事實上，由於各國政府精簡軍力之故，越來越多軍事工作交由私人軍事公司(PMC)負責，而佢地工作嘅地點亦唔只限於非洲國家。估計現時至少有4萬幾個僱傭兵係伊拉克執行任務，當中成員來至五湖四海，包括至少千多名南非人。一般黎講佢地都係執行保安工作為主，但係係伊拉克保安當然唔係就咁企係度就得，而係包括極為危險嘅護送工作，所以係衝突中死亡嘅僱傭兵亦唔少。

南非政府係1998年立法禁止該國人未經批准參予海外軍事活動，不過成效都係一般。係2004年三月，一班僱傭兵係前住赤道幾內亞途中，係津巴布偉被截停，揭發一個推翻赤道幾內亞政府嘅計畫，其中資助計畫嘅包括戴卓爾夫人個仔Sir Mark Thatcher，而係被截獲嘅僱傭兵之中，亦包括EO創辦人之一嘅Simon Mann。呢單野令南非政府極為尷尬，結果再次立例禁止南非人到海外當僱傭兵，不過有幾有效就唔知嘞。

理論上，係有國際法限制僱傭兵嘅，就係1989年嘅International Convention against the Recruitment, Use, Financing and Training of Mercenaries。不過有ratify呢條例嘅國家寥寥無幾，所以有等於冇。冇國際法規管嘅其中一個問題係，私人軍事機構成員即使犯上戰爭罪行亦無法可依，唔知點告。而另一個問題係，私人軍事機構請乜人都得，係2004年兩名為一間英國公司 (Erinys International)工作嘅南非僱傭兵係伊拉克遇到自殺式炸彈襲擊，一人被炸死，另一人重傷。兩人都曾經係南非白人政府嘅特別警察服役，而且曾係"Truth and Reconciliation Commission" 面前承認曾經暗殺反政府分子。美國嘅一間私人軍事公司Blackwater Corp，亦都請曾皮諾切特政府服務嘅軍人工作。雖然話就話公司會有一定監督，但係落到戰區，又加上法律責任成疑，後果都可以幾嚴重。

兩套戲

我呢排都真係睇左幾多戲。

上星期四睇左血鑽，星期六睇左"The Fur"。

先講血鑽。我一直對conflict stones嘅認識都唔深，不過睇完亦唔見得令我嘅認識深左；基本上血鑽只可以話係一套同時具娛樂性同文宣訊息嘅電影。

所以呢，血鑽好唔好睇好視乎你嘅1. 心情，同2. 你對非洲局勢嘅認識。
如果心情好，咁佢就係一套雅俗共賞，既有意思又不致於過份說教嘅好戲 (當然稱不上係經典)，冇悶場，亦有非洲美麗嘅風光......
但係如果心情唔好，進入左「批判少年」mode 的話，咁佢就係一套虛偽、膚淺、以exotic 為娛樂而戲中角色又過分天真......

如果一直對非洲冇乜認識，咁呢套戲亦係一個唔錯嘅介紹，套戲入面提到好多關於非洲嘅議題：狄卡比奧係羅得尼亞人，服役於32 Battalion，南非民主化後當僱傭兵；獅子山(塞拉里昂) 嘅民族自決內戰，童兵.....等等。 但係，一個對非洲有少少認識嘅人對呢種荷理活化嘅非洲又會冇乜好感，會覺得佢冇脫離到對非洲嘅stereotyping，只會加深左一般人對非洲係一個野蠻 (uncivilised) 社會嘅偏見，戲入面嘅非洲人仲要係靠白人打救添。

...........................................
至於"The Fur"，我簡單嘅講法就係......唔值得睇。要將一個人嘅心路歷程以形象化嘅方式黎表現唔係一件容易嘅事，佢以近乎戀物嘅方式黎表現我亦唔反感，不過套戲我認為係不必要地長，而且其中Nicole Kidman 首次行上樓梯嘅一個連鏡，完全感覺到係拍緊戲 - 唔係話Nicole Kidman 假，而係會令你感覺到自己企係攝影機後面睇住佢一步一步行上樓梯，然後話"Cut! Good take." 咁。

Babel

其實好耐都冇睇過戲，呢排一次過睇左兩套。

曾幾何時我係一個好鍾意睇戲嘅人，中學嘅時候，每日返學都會打開份南華早報 (真係，我而家都唔會睇啦)，當然就唔係睇新聞 (鬼睇得明咩)，而係睇電影場次。果時又一城啱啱開，我就同同學去睇戲。至今又一城AMC依然係我最鍾意去嘅戲院。

細個嘅時候崇洋，主要都係睇西片，而家諗起，都包括頗多爛片。後來讀大學，雖然都有睇戲，但入戲院睇嘅唔多，而且主要都係舊片 (咁你明啦)。果時偏好黑幫片同間諜片，《教父》、《Goodfellas》同《Scarface》都係大學時睇嘅；當然重有20套James Bond。不過，入戲院嘅次數已經少左好多，近一兩年，更加係一年都去唔夠十次。

近來睇嘅係Flags of our fathers 同Babel。

如果係以前，我諗睇完呢兩套戲，應該都會寫返幾千字，講下戰爭嘅意義同種族問題咁。不過呢，唔知係文字差左，思想僵化定係單純地懶左，而家睇完就係睇完，冇乜「有感而發」嘅野。甚至，我開始覺得係睇完戲之後嘗試去解讀佢係一件頗為......多餘嘅事，尤其係當唔同嘅人似乎要係唔同嘅解讀之間得出一個結論嘅時候。

所以呢，我而家睇完戲經常都係只得出「好睇」、「都ok」之類嘅評語。

直至尋日睇完Babel。

出左戲院我同朋友講，話：「我都唔知套戲係好睇定唔好睇......雖然我睇完都唔知佢講乜，但係似乎係好有深意嘅」。

我開頭都懷疑係自己嘅理解力差，因為見到好多人對呢套戲都有不同嘅見解，咁即係有人明套戲講乜啦？於是，我以一個小市民迷信權威嘅心態，今日一返工就上網search 影評。

好在，比我係Salon睇到呢篇，完全講出我心裡面嘅感覺。(專家係唔同d)

An hour or so in, I found myself swept up in the picture, utterly seduced by its ambitious blend of colors, cultures and sensual experiences. It felt like a transformative experience, the kind of movie that reaches for the ineffable, combining prodigious cinematic technique with impressive human range. Then, somehow, over the last third of the film the energy gradually dissipates, leaving me asking a question that in this case doesn't bear close scrutiny: What is this movie, shot on three continents in at least seven languages, actually about? [...]

Last spring at Cannes, González Iñárritu won the best director prize for "Babel," which seemed to me, even at the time, like a way of saying: We can't tell if the movie's any good in the end, but it sure looks great. (The cinematography, as in his other films, is by Rodrigo Prieto.)

原來唔係我蠢。

是日新聞

雖然我都曾經係一個國際版工作人員，不過呢，我對於國際新聞主要都係鐘意花邊嘅多；反正大路嘅新聞，要留意到唔難呀？

S'il vous plaît . . . can we be British, too?
http://www.timesonline.co.uk/article/0,,3-2548797,00.html

話說係1956年蘇伊士運河事件其間，當時嘅法國總理Guy Mollet希望同英國合作，以軍事行動搶返被埃及國有化左嘅蘇伊士運河。其中一個提出嘅方案，就係英國同法國合併。當時嘅英國總理Anthony Eden否決左呢個建議，不過就考慮過以Commonwealth方式同法國合併。結果呢個方案當然比政府否決左；而當英國係美國壓力下被迫停戰之後，覺得比人玩左一舖嘅法國就自此轉向德國尋找盟友嘞。

又話花邊新聞嘅？

係......上面段新聞最好睇其實係最後嘅「預計」：

If only we'd got it together...

- Britain would still have a thriving car industry
- The trains might just run on time
- The Channel Tunnel, an idea first mooted in the 1750s and developed by the Victorians, would have been opened at least 20 years earlier
- The end of disputes about “champagne” made in Sussex and Somerset brie
- Arsenal would stop fielding a team full of “foreigners” and England would have won the World Cup more than once
- The empire would grow from a handful of small islands to a slightly larger handful of small islands
- Tales of SAS derring do would include attacks on Greenpeace ships

公關高手

人人都話特首鐘意做show，不過細佬學藝未精，有時都唔多明佢兩位spin doctor點諗。

好似今日答問大會咁，特首就表演比我地睇乜野叫「臭寸」。

話說民主黨主席何俊仁提到普選問題，特首回應嘅時候就話可惜民主派未有共識。本來咁就冇乜問題，但係跟住何主席follow up嘅時候，澄清話其實佢地係有共識嘅，而係呢個時候，特首好輕佻咁講左一句：

「係咩？哦。」

當然我冇乜公關知識，但係到底咁做有乜用？
表示佢夠寸？表示佢同民主黨關係惡劣？ (其實又唔係喎)

細良，解釋下好喎。

定係老闆為人如此，spin doctor 都無計可施？
如果係咁，比多幾個公關高手佢都冇用。

千呼萬喚始出來

(Reuters Photo)

iPhone。


‧估計年中六月推出，只在Cingular Wireless有售，歐洲則年底有售。
‧＄４９９美元版本內置４GB，＄５９９版本內置８GB。
‧３寸半touch screen，有virtual keyboard。
‧行OS X core 嘅OS
‧可以上網影相聽歌．．．．．．

Review 在此。

是日新聞

http://www.timesonline.co.uk/article/0,,2-2537272,00.html

最新解禁的戰時文件揭露，二戰期間一名同時服務英國和納粹德國的雙面間諜曾向英國MI5自薦在納粹黨遊行中自殺式刺殺希特勒，當時的首相邱吉爾亦知悉此事，但後來卻基於未曾說明的原因拒絕此要求。

http://www.nytimes.com/2007/01/09/world/americas/09easter.html?hp&ex=1168405200&en=9dbaf13e1195aebb&ei=5094&partner=homepage

復活節島上約有９００多個莫里石像，有人希望修復大部分石像，但當地居民卻不以為然。

http://www.timesonline.co.uk/article/0,,3-2537550,00.html

一個德國的研究指，在茶中加奶會減低茶的健康效果．．．．．．
Oh.

新居入伙

細佬返而家呢分工，忙起上黎可以好忙，但亦有好多時間冇乜野做，半日望住個Mon唔知做乜。所以就開左呢個blog，雖然趕唔切做上年「時代」風雲人物，但亦叫做係無聊時有D細藝。

記得以前舊公司有煙房，有d同事一日返工有半日時間係入面吹水，不知幾好，有個全員煙民嘅部門直情會係入面開會。我唔食煙，無野做時就少左呢個蛇王好選擇，不過而家室內禁煙，可能連呢個方法都冇埋。話時話，今次禁煙嘅目的本來係要無煙工作場所，避免員工因為返工而要被迫吸二手煙，但係而家雖然室內禁煙，但係唔係所有人都係室內工作架喎！如果旺角嘅煙民全部企晒出西洋菜南街食煙，咁我諗一眾係果度開工嘅各大網絡商、學車、以至做Roadshow比相機痴漢任影嘅model，全部都會短幾年命。人地美國加州就話可以禁止係public buildings 嘅６米範圍內禁煙啫，香港？條街有幾闊呢？每邊６米根本冇地方啦。

如果公司唔比食，又唔可以成日落街，咁就只可以返屋企先煲煙。蘇格蘭酒吧禁煙之後，生意好左定差左就眾說紛紜，不過當地嘅零售業協會就話煙仔仲好賣左，可能係因為多左人係屋企食。如果係同屋企人同住，諗落都幾弊。所以政府其實應該考慮下發一種「煙房」牌，比商家開一D可以合法食煙嘅地方，當然要符合一定通風標準啦。屆時煙房開到成行成市，就可以大條道理連係街食煙都禁埋啦。仲可以製造商機添；其實人地要用二三十萬起煙房，如果証實係可以做到冇影響的話，又真係冇乜理由唔比。